Fasnachtsmuffel/Challenge 01/02, "Die ächte Helde..." Einstellungen

[shark]

Miin Schlof, der isch mer heilig,
i drüll me nommol um.
Dr Tag chunnt eh vell z eilig
u goht vell z langsam rum.

Grad hüt han i che Luscht
zum chrüpple u mi ploge,
mi packt en rächte Fruscht,
i dänk a mini Sorge.

S Gäld wird ging chli ringer,
dr Chüelschrank, der isch läär,
chuum Käsch i mine Finger,
jo, s Läbe, das isch schwär.

De Drang mi uffe z lüpfe
han i scho lang nüm cha,
un Fröid am Ummehüpfe
isch längschtens nümme da.

Dr Wäcker zeigt mr d Ziit a,
s isch chalt u dunkel druss.
Jetz en schöne Traum ha:
das wär en rächte Gnuss...

Mi Chopf sinkt zruck is Chüssi,
Mis Hirn goht auf Stand-by,
un duet als obs nüd wüssi
vo däm Chlotz us Blei im Härz u a miim Bei.

Doch plötzlech ghör i s chrache
vo dussen us dr Gass!
Was die det widder mache
macht MER eifach chen Schpass.

S isch Fasnet, fallt mer i,
die "fümpfti Ziit im Johr",
un ich be nöd debii
bliib immer usse vor.

Chanoneböller chnalle
un Guggemusik spelt,
di erschte Suufchöpf falle
- u jeden isch en Held.

Well: Wär isch duss u tschättret?
U währt sich gägge d Wält?
Wär losst sich nüd lo sägge,
u macht das won em gfällt?

"Da sin en Huufe Narre",
sait mis Hirn u motzt,
dass näbbe jedem Charre
doch widder eine chotzt.

Doch gliich: Ich ligg im Näscht,
bi truurig u verlore.
Un duss biim Narrefäscht
hän se sich widder gschwore,

dass hüüt che Räggle git.
Un alles, was süscht zällt,
zällt hüüt dann äbbe nit
für d grossi Narrewält.

Drum mein i, chönnt mer sägge,
dass de un ich gliich sin
- nur dass se dusse läbbe
un i do dinne bin.

Narri... Narro!